Materia orgánica II. Consecuencias da súa acumulación

A acumulación da materia orgánica ten lugar debido a que a velocidade de mineralización é menor que a velocidade de formación de materia orgánica.

A materia orgánica das nosas superficies deportivas é resultado da suma dos restos de sega, talos e raíces das cespitosas máis o achegue dos invertebrados, insectos e pequenos animais mortos.

As estruturas básicas están formadas de celulosa, tanino, cutina e lignina máis outras proteínas, lípidos e azucres.

Unha característica cualitativa importante a ter en conta é a relación C/N, é dicir, a relación entre o carbono e o nitróxeno total. As comunidades microbianas necesitan relacións arredor de 8 para o seu óptimo funcionamento e mineralización da materia orgánica.

Unha importante consecuencia negativa é a súa acumulación na superficie do perfil de solo, diminuíndo a porcentaxe de macroporos (poros de aireación, d>0.08mm) por tapamento destes e diminuíndo a condutividade hidráulica saturada. Por outro lado, este tapamento provoca estrés por falta de osíxeno, unha das razóns que dan lugar ao “Summer Bentgrass Decline”. Estas situacións adoitan producirse en céspedes de clima frío na época estival, cando se produce a morte de parte do sistema radicular. Este incremento da materia orgánica pode inducir o tapamento dos macroporos, o que produce unha menor taxa de difusión do osíxeno, estresando as raíces que non poden absorber auga ao diminuírse a respiración e a enerxía necesaria para tal proceso.

A partir de máis dun 4% de acumulación da materia orgánica nos primeiros 5 cm do perfil de solo, temos que prestar atención a posibles situacións de estrés, por baixo contido de osíxeno e baixos valores de condutividade hidráulica saturada. Lembremos que un 1% en peso equivale a un 5% en volume. Polo que é fundamental a labor de recebo de area para diluír estas cantidades. Ademais, a transmisión de calor aumenta ao aumentar o VWC e, polo tanto, o estrés térmico.

Outras consecuencias da acumulación son o escalpado, greens brandos, marcas de pisadas, piques profundos, etc.

Por outro lado, aspectos positivos son o aumento da capacidade de intercambio catiónico e a diminución do pH.