Augas depuradas para rega IV. Turbidez.
FOTO · TILOOM
A turbidez nas augas depuradas é un parámetro indicador da transparencia da auga, debido á presenza de materias en suspensión. Cantos máis sólidos en suspensión existan, máis “sucia” aparecerá esta e máis alta será a turbidez. Os sólidos en suspensión son, á súa vez, unha fracción dos sólidos totais dunha mostra de auga.
O valor da turbidez mídese en unidades NTU: Unidades Nefelométricas de Turbidez. O instrumento usado para a súa medida é o nefelómetro ou turbidímetro, que mide a intensidade da luz dispersada a 90 graos cando un raio de luz pasa a través dunha mostra de auga.
Diferentes condicións afectan ao nivel de turbidez: contido de materia orgánica, fitoplancto e fundamentalmente as formas nitroxenadas, etc…
Os efectos prexudiciais son varios:
- A absorción de calor polas partículas suspendidas, polo que estas augas turbias se volven máis quentes, reducindo así a concentración de osíxeno na auga ( o osíxeno disólvese mellor en auga fría),
- Unha alta turbidez favorece a multiplicación de certos organismos,
- A diminución da penetración da luz e da actividade fotosintética en plantas e algas, o que reduce aínda máis a concentración de osíxeno,
- Maiores atascos dos sistemas de irrigación,
- Maiores necesidades de produtos para a súa desinfección,
- Sedimentación de partículas no fondo dos nosos lagos, que se colmatan e dan aspectos desagradables para o público que desexa xogar ao golf.
Estudos realizados polo biólogo Ramón Fernandez Pinilla, con motivo de eliminar a turbidez das augas indican que a salinidade está moi relacionada con este parámetro. Cando a salinidade aumenta, a turbidez baixa e ao diminuír a salinidade, a turbidez aumenta. A sal inhibe o crecemento das poboacións de bacterias nitrificantes que producen turbidez.
A turbidez, por outro lado, afecta aos tratamentos herbicidas; segundo a U.S. EPA (United States Environmental Protection Agency) o nivel máximo debe ser 5.0 NTU, Patrick Mccullough Ph. D. University of Georgia, USA “Maximizing Efficacy of Herbicides for weed control in Turfgrass Management“.
