Augas depuradas para rega (I). EDAR
FOTO · TILOOM
Cada vez son máis as instalacións deportivas que se nutren de augas depuradas procedentes de Estacións Depuradoras de Augas Residuais, EDAR.
As EDAR son instalacións que reciben as augas residuais que lles chegan a través da rede de saneamento e onde, mediante unha serie de tratamentos e procesos, se elimina a contaminación delas, posibilitando a súa reutilización nas nosas superficies deportivas (campos de golf, campos de fútbol, etc.). Os procesos que se dan nas EDAR reducen o consumo de osíxeno disolto nas augas ao descompoñerse a materia orgánica das augas residuais, e por conseguinte a anaerobiose que provocaría nos nosos campos de golf, o desprendemento de malos cheiros, microorganismos patóxenos, etc…
Os parámetros máis importantes en relación coa calidade que temos que ter en conta da EDAR que nos proporcione a auga de rega son os seguintes:
- Sólidos en suspensión, materias sólidas de tamaño superior a 1 micra. Facilmente separables da auga residual se se mantén en repouso un tempo. Límite: 35 mg/l
- Demanda biolóxica de osíxeno (DBO5), osíxeno que necesitan os microorganismos da auga para estabilizala nun tempo normalizado de 5 días. Canto máis alto é o valor, peor calidade ten o vertido. Límite:25 mg/l
- Demanda química de osíxeno (DQO), osíxeno equivalente para estabilizar (oxidar) os contaminantes que ten a auga mediante oxidantes químicos. Límite: 125 mg/l
- Nitróxeno (estas achegas haberá que restalas do plan mensual de adubado), amoníaco, nitróxeno orgánico, nitratos e nitritos
- Fósforo (achegas que haberá que restar do plan mensual de adubado), fósforo total, ortofosfato disolto
- Metais pesados
- acidez/alcalinidade
- condutividade
A reutilización de augas depuradas esixe o cumprimento do real decreto 1620/2007, do 7 de decembro, que establece o Réxime Xurídico da reutilización das augas depuradas en España. No caso de campos deportivos está dado polos seguintes:
- Nematodos intestinais: 1 ovo/10L
- Escherichia Coli: 200 UFC/100mL
- Sólidos en suspensión: 20 mg/L
- Turbidez: 10 UNT
- Legionella spp: 100 UFC/L
En xeral os procesos que teñen lugar nas EDAR son:
- Procesos físicos (decantación, espesamento, secado)
- Procesos químicos (coagulación, floculación)
- Procesos biolóxicos (aerobios, anaerobios, anóxicos)
E as operacións son:
- Tratamentos previos (pretratamentos, desbastes)
- Tratamentos primarios (físico, químicos)
- Tratamentos secundarios (biolóxicos)
- Tratamentos terciarios (desinfección)
- Tratamentos de lodos (espesado, dixestión, secado)
O aproveitamento dos lodos estabilizados é un recurso importante co que podemos contar como adubo nas nosas instalacións deportivas.
