Contido volumétrico de auga (VWC): mide mellor a túa rega

O contido volumétrico de auga ou humidade (Volume Water Content) é unha medida numérica, porcentual, da humidade do solo.

O VWC mide a relación entre o volume de auga dun solo e o seu volume total.

Un volume calquera de solo estará ocupado por unha fracción sólida, (xa sexa orgánica como material vexetal e/ou mineral como partículas de area) e outra fracción oca constituída por poros pequenos e grandes, susceptibles de seren enchidos por aire e auga.

En ausencia de auga todos os poros están ocupados por aire (situación de murchamento permanente) e a auga achegada ao solo enche primeiro os poros pequenos (situación de capacidade de campo). Posteriormente os grandes (situación de saturación do solo). A diferenza entre capacidade de campo e punto de murchamento permanente dará a auga dispoñible para a planta.

Os solos de diferentes texturas como areas e arxilas presentan a saturación ou capacidade de campo a distintas porcentaxes.

É común atopar en greens USGA porcentaxes de saturación arredor do 40% volumétrico, capacidades de campo arredor do 25 % volumétrico. Segundo a especie de gramínea sexa C3 ou C4 (con menor ou maior tolerancia á seca) alcanzarán o punto de murchamento permanente por debaixo do 10% volumétrico.

É intuitivo ver como os diferentes ciclos de rega coinciden coa capacidade de campo do green (26% volumétrico), ver gráfico adxunto.

Existen numerosos sensores para medir o contido volumétrico de auga ou humidade do terreo. Desde os TDR da marca Spectrum ata os FDR da marca Decagon, pasando polos sensores de impedancia coaxial de Stevens Waters, ou os novidosos sistemas POGO ou Environmesh de Tiloom.