Cricket III: Compactación do pitch

A compactación do pitch (rulado) é, sen dúbida, un dos procesos máis importantes para a consecución dun óptimo Cricket Pitch, achégalle firmeza e diminúe o risco de lesións para os xogadores. Tanto o exceso como a falta de rulado poden dar lugar a efectos moi negativos.

O obxectivo principal do rulado consiste en conseguir un pitch máis consistente, cunha menor deformación fronte aos impactos dos bateos, ademais de proporcionar un maior bote da pelota. Agronomicamente, pódese observar como a compacidade do substrato se modifica, a través da medición da densidade aparente.

Facilmente, pódese pasar de valores de 1,3 g/cm3 ata 1,7 g/cm3 a través de operacións de rulado (con máquinas manuais ou Pitch Rollers como as da imaxe principal)

A compactación só se pode realizar sobre perfís de solos con pouca humidade, posto que a auga de poro é incompresible. Só é posible reducir o volume do solo ocupado por aire.

O solo compáctase porque diminúe o seu volume, aumentando a densidade aparente, fenómeno que só ocorre cando se compactan poros gasosos. Os poros húmidos son incompresibles.

Conforme se rulan os wickets diminúese o volume do solo (diminúe o volume gasoso), aumentando proporcionalmente a % de poros enchidos por auga sobre o total. A compactación é totalmente imposible en condicións de saturación do perfil de solo e moi difícil con rangos de % de aire arredor do 5%.

O estudo para a correcta compactación dos wickets está dado polo “Proctor Test” (que utiliza o coñecido Clegg Hammer de 2,5 kg para a compactación) e expresa a relación da densidade aparente fronte á % VWC.