PONPAKETAK V. EREDU HIDRAULIKOAK
ARGAZKIA · TILOOM
Software ugari dago kirol-instalazioetako presiozko sare hidraulikoen diseinua aztertzeko. Adibidez, USEPA-k (U.S. Enviromental Protection Agency) software indartsu bat garatu du: EPANET.
EPANET presiozko sare hidraulikoen portaera hidraulikoaren simulazioak aldi luzeetan egiten dituen programa da. Hodietako emarien bilakaera, sarguneetako presioak, deposituetako mailak eta uretan dauden espezie kimikoen kontzentrazioa ere jarraitzen ditu. Gainera, ez dago mugarik prozesatu beharreko sarearen tamainari dagokionez, ukondo eta osagarrietako galera txikiak kontuan hartzen ditu, abiadura finkoko edo aldakorreko ponpak onartzen ditu, energia-kontsumoa eta haren kostuak zehazten ditu, etab.
Modelazio horiei esker, ponpaketa-estazioa diseinatu eta optimizatu daiteke, proposatutako irtenbide desberdinen azterketa tekniko eta ekonomiko baten bidez
Software horiekin kontsigna-kurba kalkula dezakegu ponpaketa-estazioa kokatuta dagoen puntuan; hau da, ponpak eskariaren mailaren arabera hornitu behar duen presioa. Ponpaketa-sistema kontsigna-kurba horretara egokituz, sare osoan presioak mantenduko dira ezarritako gehieneko eta gutxieneko balioen artean. Kontsigna-kurba horrekin gure beharretara hobekien egokitzen den ponpaketa-estazioa zehaztuko dugu.
Software horiekin ureztatze-sistemak sortzea ez da soilik diseinatzeko errazagoa. Akatsak saihesteko ere errazagoa da.
Ponpa egokia aukeratzeak bere punturik onenean, hau da, errendimendu onarekin, funtzionatzea ahalbidetuko digu. Komeni da paraleloan dauden ponpekin (edo abiadura aldakorreko ponpekin) lan egitea. Horrela, eskaria aldatu ahala, ponpa-kopuru jakin bat abiaraziko da edo geldituko da (edo biraketa-abiadura aldatuko da), beti haien punturik onenetik gertu funtzionatzeko edo, gutxienez, errendimendu onargarriko eremuetan.
