Delta T – Como calibrar unha cuba?
FOTO · TILOOM
As aplicacións de pulverizacións en cuba son o pan noso de cada día no campo. O seu uso é tan intensivo que cando hai problemas coa cuba o calendario de traballos resínteo. Para que as aplicacións sexan efectivas é imprescindible realizar calibracións frecuentes para ir dando seguimento aos cambios da máquina. Pero, sabemos como calibrar unha cuba?
Calibrar a cuba é unha actividade imprescindible para realizar pulverizacións correctas; na entrada de hoxe veremos como facer unha calibración axeitada.
Ter a cuba calibrada cun caudal coñecido é tan importante como facer un bo caldo.
- Colocar no campo dous puntos separados 100 metros
- Realizar o percorrido dos 100 metros na marcha desexada e coas revolucións requiridas.
A marcha e as revolucións determinan a presión de traballo da bomba e o tipo de pulverización que as boquillas realizarán. Recoméndase realizar esta medición da forma máis parecida a como se faría durante a aplicación dun produto.
Hai que ter en conta que acender ou non o axitador pode cambiar a presión de traballo.
- Rexistrar o tempo que se tarda en percorrer os 100 metros
O tempo rexistrado durante o percorrido dos 100 metros é clave para poder coñecer a pluviometría da cuba coas condicións fixadas con anterioridade.
- Medir a lonxitude dos brazos da cuba
Exemplo:
Se tardamos 1 minuto (60 segundos) en percorrer 100 metros e a anchura dos brazos da cuba é de 6 metros sabemos que podemos aplicar 600 metros cadrados nun minuto.
Agora é o momento de saber que caudal temos, para iso é necesario un vaso calibrado en mililitros. É importante volver pór a máquina coas mesmas revolucións e presión que nos pasos anteriores, pero neste momento a cuba debe estar en punto morto. Cando a cuba estea traballando no punto desexado débese comezar a pulverización en parado.
- Co vaso graduado calcúlase o volume que unha boquilla solta nun tempo coñecido.
É mellor utilizar tempos facilmente multiplicables, 10 segundos, 30 segundos ou un minuto.
- Calcular canto volume se aplica con todas as boquillas no tempo no que se percorren 100 metros.
Exemplo:
A boquilla vermella solta 1,1 litros en 30 segundos. No tempo que se percorren 100 metros coas condicións desexadas (60 segundos) minuto solta 2,2 litros. A cuba ten en total 11 boquillas así que en total a cuba verte 24.2 litros en 60 segundos.
Podemos concluír finalmente que en 600 metros cadrados a cuba pulveriza 24.2 litros. A través dunha sinxela regra de tres calcúlase que nunha hectárea (10.000 metros cadrados) a cuba pulveriza 403,33 litros.
Desta sinxela forma sabemos con exactitude cal é o caudal da nosa cuba e poderemos ser moito máis precisos cos tratamentos pulverizados. Se unimos estes sinxelos cálculos ao uso da variable Delta T teremos as ferramentas necesarias para realizar un traballo de pulverización efectiva, segura e de máxima calidade.
Se queres instalar unha estación meteorolóxica no teu campo ou incluír unha estación ultrasónica montada na túa cuba contacta connosco en info@tiloom.com e axudarémoste a elixir as ferramentas de medición meteorolóxicas perfectas para ti.
